Нийгмийн бодлогын байнгын хорооны хуралдаанаар Эрүүл мэндийн даатгалын үндэсний зөвлөлийн 2021 оны үйл ажиллагааны тайланг сонсов.
Энэ үеэр Капитал банкны өрөнд авсан орон сууцыг Эрүүл мэндийн даатгалын сангийн ажилчдад өгсөн гэдэг мэдээлэл яваад байгаа талаар зарим гишүүн асууж тодруулсан.
Эрүүл мэндийн даатгалын ерөнхий газрын дарга Л.Бямбасүрэн: Эрүүл мэндийн даатгалын үндэсний зөвлөлөөс 2021 онд баталсан журамд “Эрүүл мэндийн даатгалын ерөнхий газар нь сангийн авлагад тооцон авсан орон сууцыг эрүүл мэндийн даатгалын байгууллагын албан хаагч болон иргэн, хуулийн этгээдэд банкны зээлээр болон бэлэн мөнгөөр худалдан борлуулах ажлыг зохион байгуулж болно” гэж заасан байдаг. Гэхдээ өрөнд авсан орон сууцуудыг ажилтан, албан хаагчдадаа зүгээр өгөөгүй. Үнийн дүнгээр нь банкны зээлд хамрагдаад авах боломжийг олгосон. Ажилтнууд банкны зээлд хамрагдаж, мөнгө нь Эрүүл мэндийн даатгалын санд шилжиж ирэх юм.
