Их, дээд сургууль болон ерөнхий боловсролын сургуулийн сурагчдын танхимын хичээлийг ирэх сарын 1-нээс эхлүүлэх талаар Боловсрол, шинжлэх ухааны сайд Л.Энх-Амгалан хэлж байсан юм. Тэрбээр “Танхимын хичээлийг гуравдугаар сарын 1-нээс эхлүүлье гэж бодож байгаа. Сурагчид маш их хоцрогдолтой байгаа. Нэг хичээлийн жилд 165-180 хоног хичээллэх ёстой. Гэтэл өнгөрсөн онд 80 гаруй хоног цахим, теле хэлбэрээр хичээллэснээс болоод нийт сурагчийн 70-80 хувь нь хоцрогдолд орсон байна.
Миний бас нэг санаа зовж байгаа зүйл бол цахим, теле хичээл орж байх үеэр 174 мянган хүүхэд гар утас, компьютергүй, интернэтийн сүлжээгүй газарт байна. Улаанбаатар хотод гэхэд гэр нь цахилгаанд холбогдоогүй 30 мянган өрх байна гэдэг судалгаа бий. Тэдгээр өрхийн хүүхдүүдэд анхаарлаа хандуулъя гэж бодож байгаа.
КОВИД 19-ийн өндөр дэглэмтэй байгаа дэлхийн 130-аад улс орон ерөнхий боловсролын сургуулийн хичээлээ явуулж байгаа юм билээ. Тиймээс миний УОК-т илэрхийлсэн байр суурь, цаашлаад Засгийн газрын хуралдаанаар хэлэлцүүлэх асуудал бол гуравдугаар сарын 1-н гэхэд улс даяар танхимын хичээлийг явуулна. Нийслэл дээр санаа зовоож байгаа нэг зүйл бий. Тэр нь юу гэхээр зарим сургуулийг PCR шинжилгээ авах төв болгочихсон байгаа. Тиймээс гуравдугаар сарын 1-нээс өмнө ариутгал, халдваргүйтгэлийн асуудлыг шийднэ” хэмээж байсан билээ.
Улмаар танхимын хичээлийг ирэх сарын 1-нээс эхлүүлэх бэлтгэл ажил хангагдаж байгаа юм.
Тэгвэл энэ талаар Засгийн газрын Хэвлэл мэдээллийн албаны дарга Ц.Ганзориг “Боловсрол, шинжлэх ухааны яамнаас танхимын хичээлийг тодорхой квот тогтоогоод гуравдугаар сарын 1-нээс эхлүүлэх саналтай байгаа. Гэхдээ дарааллын хувьд УОК хэлэлцээд Засгийн газар батлах ёстой. Тиймээс эцсийн шийдвэр гараагүй байна. Олон нийтийн дунд судалгаа хийж үзэхэд 60 хувь нь дэмжиж, 40 хувь нь дэмжээгүй. Дархлаажуулалтын явц өрнөж байгаа эрсдэлтэй орчинд танхимаар хичээллүүлэхгүй гэх ерөнхий байр суурьтай байгаа. УОК, Засгийн газар эцэслэн шийдвэрлэсний дараа мэдээлэх болно” гэлээ.
